Die Goue Knippie

Lank, lank, lank gelede sit Lewies een aand voor die rekenaar.

“Lewies!” roep Vroukie.

“Ja Vroukie?”

“My kas se deur is stukkend, kom kyk bietjie”

“Jis Vroukie, ” sê Lewies, “ek is nou besig jong, ek sal later kom kyk” Lewies vermoed iets wat DIY impliseer.

“Waarmee??” verneem Vroukie.

“Ek is besig op die rekenaar”

“Om te wat? Met die bog op jou blog?”

Eish. Kolskoot.

“Oukei Vroukie, ek kom kyk gou”

Lewies betrag die deur nadenkend. Dan sê hy verlig.

“Ek sien nie fout met die deur nie.”

“Nee man, kyk die deur bly nie toe as ek dit toemaak nie. Lyk my die hakie daarbo is af. Kyk”

Lewies kyk. Inderdaad, die hakie is af

“Inderdaad, die hakie is af” is Lewies se slotsom.

“Ek sal more een koop en die deur regmaak”

“Ag, jy is ‘n sweetie pie!”

Lewies smaail ingenome.

Lank, lank gelede sit Lewies een aand voor die rekenaar.

“Lewies!!” roep Vroukie.

“Ja Vroukie?”

“Wanneer gaan jy my kas se deur regmaak?”

“Jou kas se deur?” wonder Lewies

“Ja, my kas se deur!” Lewies en Vroukie is agt en dertig jaar getroud en daar is ‘n vae ondertoon in haar stem wat hy hy nie vertrou nie.

“O, jy meen die hakie wat gebreek het!”

“Dis presies daai kas wat ek meen!!!” Vroukie praat in uitroeptekens.

Lewies besef: Hier kan nou huismoles kom. Hy neem sy toevlug tot die filosofiese berusting van Salomo; ‘n Sagte antwoord keer die grimmigheid af.

“Oukei, Vroukie” sê hy, “ek sal more die hakie koop en die kas se deur regmaak.”

Lank gelede sit Lewies een aand voor die rekanaar.

“Lewies!!!” roep Vroukie.

Lewies vermoed ‘n ongeduldigheid in haar stem.

“Ja Liefie?” probeer hy die troebelrigheid suiwer.

“Vergeet van Liefie! Fokkit Lewies, wanneer maak jy my kas se deur reg?”

“Jinne Vroukie, ek was die afgelope tyd baie besig…”

“…met wat? Met rondlê op die blogs en jouself vermaak met bogstories? Luister…”

“…nee, nee Vroukie, daar is darem ander dinge ook…”

“…jy moet net sê as jy nie…”

“…nee, nee Voukie, moet nou nie…”

” .. die blerrie deur wil…”

“…so wees nie…”

“…regmaak nie dan kry ek iemand om dit te doen en die rekening is vir jou sak”

Lewies kry nie ‘n woord in te midde van die tirade nie en blaas die aftog.

“Oukei Vroukie, oukei” sê hy vertroostend.

“En moenie my kom blerrie patronize nie !!!” Weer die uitroeptekens

Die dag daarna gaan Lewies na die hardeware winkel. Hy het nooit besef dis so moeilk om te beduie dat hy ‘n hakie vir ‘n ingeboude kas se deur wil hê nie. Uiteindelik roep die verkoopsman ‘n werker nader wat besig is om die vloer te vee.

“Thabo,weet jy wat die meneer wil hê?”

“Die meneer soek ‘n catch vir deur” antwoord  Thabo terwyl hy ongesteurd verder vee.

Dis toe verdag maklik om die catch terug te sit. Lewies kan nie glo niks breek nie of hy slaan  nie sy vinger raak met die hamer nie of die skroewedraaier gly en kloof sy pols oop nie. Een twee drie en Bob is jou oom.

“Kyk Vroukie,” sê hy triomfantelik toe Vroukie by die huis kom. Hy voel soos Noag toe hy die ark aanmekaar getimmer het. “Kyk net, ek het ‘n nuwe knippie ingesit en nou werk die deur piekfyn”

“Mmmm, ‘n goue knippie nogal”

“Net die beste vir jou!”

“Ag Lewies, hoe kan ek dankie sê?”

“Wel, dalk sal die Bybelse manier werk. Jy weet, ‘n oog vir ‘n oog” Lewies het ‘n slinkse smaail op sy gesig.

“Jy meen ‘n knippie vir ‘n knippie?” Daar is ‘n twienkel in Vroukie se oog.

“Net so, en dalk twee vir ‘n goue een?”

“Lewies!!”

Advertisements

49 thoughts on “Die Goue Knippie”

  1. Toe ek netnou vir Ou Top lees, wonder ek wat van jou geword het…julle twee het net die vermoë om op dieselle tyd/dag te blog. (dalk is dit net my verbeelding)Ek giggel nou so lekker vir jou storie. Ek vra nie meer nie, Lewies, ek doen dit sommer self. Ek blow torch en skuur en grind en boor als met my eie tools. 😀

  2. Ken die storie – maar ek is slim, teen die 3de keer vra ek hom om gou vir my die tools te bring – dan moet jy sien hoe vinnig dit gedoen word.

  3. En daar score Lewies weer! Lekker langnaweek hou! Maak nou alles wat stukkend is, reg. Dink net aan die vergoeding wat wag…

  4. Dink net hoeveel goue knippies jy nie al kon gekry het as jy vroeër begin luister het na die baas van jou plaas nie, Lewies. Oulik vertel! 😉

  5. Nie baie punny nie – ‘n broodknippie is daai plat stukkie plastiek wat die plastieksak waarin die gekoopte brood kom, toehou…

  6. lank lank gelede in ‘n honeymoon bed, los ‘n vroutjie ‘n windjie:oepsie doepsie, vroutjie het gepoepsie, koer die manveertig jaar later doen sy dit weer:fok vrou, jy kak my uit die bed uit, grom die manlewies, maak reg die fokken kas!!!

  7. Wyseman het vandag so baie skroefies ingedraai en spykers ingekap vir al ons skilderye en goete, dink jy ek skuld hom iets?

  8. Hier was al identiese gesprekke, net ander name. My vrou maak maar alles self reg. Ek met my ‘tien ronde duime’.

  9. Skryf meer dat ek meer kan lag. Die ander ouens op Litnet het uit voorraad geraak. Dis elke dag dieselfde stories, gevloek en geboelie.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s